Një qëndrim i fortë ka ardhur nga Gjermania në lidhje për negociatat mes Kosovës dhe Serbisë.
Një nga analistët e rëndësishëm që merret me marrëdhëniet rajonale, Bodo Weber, pjesëtar i Këshillit për Demokratizim, me seli në Berlin dhe Bruksel, ka theksuar se negociatat mes Serbisë e Kosovës po ecnin jo keq në aspektin politik, duke vënë theks tek njohja e ndërsjelltë, por ata u prishën nga Richard Grenelli, i cili e ktheu procesin në pikën zero.
Deklaratë kjo, që po ta përballësh edhe me qëndrimet e disa protagonistëve të ngjarjeve, krijon një vështrim më të kthjellët për situatën.
Hashim Thaçi ka thënë disa herë se nga drafti i Uashingtonit u hoq pika 10 që flet për njohjen e ndërsjelltë. Ndërkohë edhe Vuçiç tha në Uashington se “kemi hequr pikën që na detyronte të njohim Kosovën”.
Qëndrime këto që flasin realisht se kemi të bëjmë me një prishje të rëndë të skenarit fillestar.
Ndaj dhe eksperti gjerman Bobo Weber thotë se bisedimet që po zhvillohen në Bruksel janë paranegociata për të arritur tek pjesa politike e tyre.
Prishja e këtyre negociatave thekson Weberi kanë si shkak, veprimet e të dërguarit të posaçëm të administratës Trump për dialogun, Richard Grenell si dhe kolegëve të tij brenda administratës.
“Mendoj se është e qartë për secilin që dëshiron ta shohë, ndonëse është e kuptueshme që nuk do të pranohet publikisht prej zyrtarëve të BE-së, se negociatat në Bruksel janë cënuar nga Grenelli dhe kolegët e tij në administratën Trump, përmes veprimeve të njëanshme dhe tërësisht egoiste që çuan te publiciteti i 4 shtatorit në Shtëpinë e Bardhë”, ka thënë analisti i njohur.
Sipas tij, deri në janar të vitit të ardhshëm, kur administrata amerikane, varësisht prej zgjedhjeve presidenciale të nëntorit, do ta lërë anash apo do t’i krijojë hapësirë BE-së, nuk mund të ketë rifillim të mirëfilltë të negociatave apo ndonjë marrëveshje gjithpërfshirëse, të cilën BE-ja është duke e përgatitur që nga vjeshta e vitit të kaluar.
Takimet e caktuara gjatë javës së kaluar në kuadër të dialogut Kosovë-Serbi u anuluan. Arsye u tha të jetë COVID-19, teksa datat e reja të takimeve ende nuk janë caktuar.
Weber thotë se kjo periudhë para rifillimit të negociatave të mirëfillta duhet që nga BE-ja të shfrytëzohet për ta detyruar Prishtinën dhe Beogradin që t’i shtrojnë në tavolinë qëndrimet fillestare rreth të gjitha çështjeve që duhet të jenë pjesë e marrëveshjes gjithpërfshirëse.
“Ky do të ishte një hap i madh përpara pasi që asnjëra palë nuk ka demonstruar gjatë tri vjetëve të kaluar gatishmëri për të definuar dhe vënë në letër platformën e saj”, ka thënë ai.
Weberi shton se BE-ja do të duhej t’u kërkonte të gjitha partive në pushtet, por edhe atyre në opozitë, që ta paraqesin një plan se si synojnë t’i kapërcejnë dallimet për ta siguruar një shumicë prej dy të tretash në Kuvend, për një marrëveshje përfundimtare.